VI MIHLSons-XXI 2018

Lugo

2018

Edicións:
2023
2022
2021
2020
2019
2017

A música contemporánea máis aló de Occidente

“Na música de Hosokawa encóntrase unha rara combinación de música tradicional xaponesa e do modelo compositivo da vangarda musical alemana do período de posguerra. O seu discurso destaca pola coidadosa atención ó son, especialmente ó timbre, e polas intrusións sonoras inesperadas e audaces. Exprésase a través dun pensamento contemplativo no que destaca o silencio.” Carme Miró

Coa aparición a mediados do século XIX dos nacionalismos no romanticismo musical, infinidade de compositores encontraron na mistura entre a música tradicional dos seus países de orixe e a tradición centroeuropea a razón de ser da súa creación musical, deixando tras de si multitude de sendeiros polos cales outros seguiron investigando e profundizando na procura de acadar unha linguaxe persoal única e transcendente. Nun deses vieiros a medio camiño entre o redescubrimento das músicas máis ancestrais das súas culturas e as tendencias occidentais máis vangardistas é onde podemos encontrar ós compositores orientais xa clásicos da música contemporánea Toru Takemitsu e Isang Yun ou ó máis actual Toshio Hosokawa.

“Estou a buscar unha nova forma de cultura e música espiritual xaponesa, a través da cal podo seguir sendo fiel a min mesmo e ás miñas orixes. Necesitamos examinar de novo o mundo occidental, máis coidadosamente, para que nos vexamos obxectivamente e para realmente coñecernos “. Toshio Hosokawa

Tras as dúas últimas edicións dedicadas á música contemporánea europea e americana e na procura de pechar o círculo desta ollada xeral ó panorama musical actual, o VI Ciclo de Música Contemporánea de Lugo “MIHLSons-XXI” abordará a música contemporánea non occidental dende perspectivas tan diferentes coma as que cultivan hoxe en día compositores sudamericanos, persas ou do lonxano oriente, aportando ademais tres estreas mundiais . Para iso, esta edición contará coa participación da pianista iraní Aida Sigharian, da percusionista lucense Sabela Castro, do ensemble galego Vertixe Sonora, que presentará dous programas a cargo do seu pianista David Durán e o saxofonista Pablo Coello e un terceiro programa de cámara, ademais da participación do grupo de danza contemporánea do Conservatorio Profesional de Danza de Lugo e do grupo de percusión do Conservatorio Profesional de Música Xoán Montes, nesta ocasión presentando o espectáculo “Orixes”.

Diego Ventoso Fernández

Dirección artística e coordinación do Ciclo